Bjarni Ben. bjargi málunum

Færi nú ekki alveg frábærlega vel á því ef þeir flokksformennirnir Bjarni Ben. og Sigurður Ingi skiptu bara einfaldlega um ráðherrastóla? Þá gæti Bjarni barið út af borðinu fyrirhuguð skemmdarverk í Skerjafirði og "þunga" Borgarlínubullið. Sigurður Ingi á erfiðara með það af pólitískum ástæðum, illskljanlegum að vísu. Hann yrði þó án vafa prýðilegur fjármálaráðherra, æsingalaus og athugull maðurinn, hokinn af reynslu og innsýn í obba alls þjóðfélagsins, einnig sársauka.

Það liti að mínu mati illa út að skipta núna um utanríkisráðherra, jafnvel þótt vinir okkar Ísraelar hafi orðið fyrir árás villidýra sem kalla sig Hamas. Það hefur ekkert verið út á störf núverandi ráðherra að setja svo nokkru nemi - þótt fegurð hennar kunni að hafa flækst eitthvað fyrir sumum. Ég vísa í það sem Bandaríkjamenn kalla "pretty-girl syndrome" og sást eitt sinn þýtt sem "sætu-stelpu fárið" á okkar ylhýra. Lýsir sér t.d. í því að fögur stúlka er öfunduð og hötuð af mörgum ófríðari. Grunnhyggnir karlmenn telja þær sætu vera óhjákvæmilega heimskar. Aðal töffararnir líta á þær sem sína lögmætu eign og dauðadrukknir ruddar missa út úr sér slefuna yfir lærin á þeim í svæsnustu tilfellum að sögn. Áslaug Arna gæti einnig átt við þetta vandamál að stríða og margar aðrar. Málaður punktur á andlitið t.d. efst á kinn eða neðan við munnvik, kvað vera einfaldasta lausnin á vandamálinu.

Gaman að þetta fyrsta blogg manns skuli vera að verða til, einmitt þegar alþingismenn og ríkisstjórnin eru stödd á Þingvöllum, að vísu í kulda og trekki en það er kannski við hæfi. Líklegt er að kalt mat verði lagt á margt og þjóðin þarf að þreyja biðina til morguns.